To offer you a better browsing experience, the site uses cookies. By continuing to browse the site you authorize the use of cookies.

Stòrdja

Di hoachebene vo Lusérn iz sa gest gelebet sidar dar zait von khupfar, azpe da zoang di övan zo smèltza disan mineràl un ettlane ordenje vodar sèlln zait gevuntet grabante.
Di zimbarn laüt però soin gerift auvar da lai von djar 1200 vort, da soin khent vodar Bavìara her zo pracha di beldar un håm gelebet in höff geströbet affon pèrge.
Di earstn haüsar soin khent augemacht pinn sistèm von blockbau, kraützegante di hültzran travan, di tèchar soin gest pitt lattn augehaltet pitt groaze bürf.
Gianate vür un khemmante zuar hèrta mearare laüt soinda khent gemacht naüge haüsar, nemear pitt holtz ma nützante in khnott.
Peng in bintsche sånt un di erme von laüt sin atz halbe von djardar 1800, bintsche haüsar soin khent smaltàrt auzzalt, asó ‘z lånt hatt auzgesek gemacht pitt groase khalcharne khnottn.
Di mearastn haüsar håm gehatt an uantzegen piåno boda håm gelebet di laüt, untar soinda gest di stèll un obar di tetsch von höbe boma hatt higelekk ‘z geèzza o.
In haus saitma augån pittnar khnöttan stiage, di merastn vert gedekht pittnan tèchle.

MUSÉO “HAUS VON PRÜKK”

’Z haus von Prükk iz an altz haus vo baké auzgerichtet vo naügom, boda però iz gestånt gelaich azpe in di djar achthundart. ’Z haus iz gest schümma ma ormai halbe argevallt, asó dar Kulturinstitut hattz argekhoaft un auzgerichtet haltantez daz meraste asó azpe ‘z hatt z’soina gest dise djar.
’Z Haus von Prükk iz pròpio tortemitt in lånt, affon Pill, un iz getoalt in zboa saitn saiz azpe akitertùt saiz azpe eltom. ’Z iz gelekk atz drai un viar livèlln.
Di sait a nort iz khent augemacht ume atz halbe 1800, untar zboa vert; an earstn stèll un earstar piano, biane djar spetar iz khent augeheft un hatt auzgesek, in groazan gåntzan, azpe haüt. In di djardar soinda khent gebèkslt lai di travan boda håm gestützt di tetsch un dòpo in Groaz Vaür von 1911soinda khent gebekslt di lèrchan lattn pitt plèch.
Von haus zuar sud anvetze saitma nèt sichar benn ’z iz khent augemacht, furse sa in di earstn von 1700 bazma boazt von kartn auz iz ke di lestn djar von 1800 ‘z haus hatt auzgeschauget asó azpe ’z iz khent auzgerichtet haüt.
’Z Haus von Prükk iz ja an muséo boda zoaget di stòrdja von lånt ma ’z iz o eppaz lentegez boda, in di lam summar abas di laüt vennese zo kontara alte stòrdje, boda asó khemmen gehaltet un vürgetrakk. .