To offer you a better browsing experience, the site uses cookies. By continuing to browse the site you authorize the use of cookies.

Arbatn nå in holtz

Dar 60% vodar earde von kamou vo Lusérn iz gedekht von balt. Daz mearaste soinz vaüchtn, puachan, tånnen, mindar, ma allz ummaz, venntma lèrch, vorn, un esch. Zo macha vestadar, möbl, travan vor di tèchar, un vlekhan nütztma iantrar di vaücht a guatz holtz boda auzhaltet in vrost un bodase lazzt arbatn dèstar. Pinn lèrch gesaget nå dar vena hattma gemacht lattn vor di tèchar bait an zentimetro. boda, aughaltet pitt groaze khnottn, hattma gedekht di haüsar. Schiar alle di haüsar vo Lusérn soin gest gedekht asó, sin azta auzizgeprocht daz groaz vaür von ’11 boda hatt argeprunnt daz gåntz lånt; sidar alora di tèchar soin khent gedekht pitt plèch. Zbisnen in lestn djardar von achthundart un di earstn von nounhundart soinda khent gemacht ettlane beng von soldàn un asó iz khent destrar vüarn ’z gehültz bomaz hatt genützt, un destrar iz khent vorkhoavanz o.

In di djar 1942 un 1943 izta khent genützt vil ‘z holtz von mung, boda di stachlövan vo Padua håm vorprennt in vuaz von kholl, in disa arbat soinda khennt ingestèllt vil lusérnar o. Hakhan in balt, innsetzan vaüchtla, vor di Lusérnar iz hèrta gest a guata arbat. Di baibar un di khindar håm hèrta gehatt zo tüana zo macha au est un zo halta saubar in pon. Di lusérnar håm nia gemak tüan pitt mindar zo macha au holtz vor in bintar saiz zo khocha, saiz zo halta barm di haüsar. ’Z soinz hèrta gest di baibar zo lega zuar ‘z holtz vor in bintar, ombromm di månnen soin gest daz mearaste übar di bèlt z’arbata. Di beldar però soin von kamou un asó hattma augemacht est, rong un stökh un allz bazta håm hintargelatt di menèkkar. ’Z holtz augemacht iz khent gekhastet afte tetschan odar untar in potesöln, ma mucht o khön, ke ma hatt hèrta gesüacht z’sparaz daz mearaste boma hatt gemak. No haüt di lusérnar vorsan in kamou zo macha au ’z holtz ma berda detzidart soinz di forestél, se khön biavl un bo zo hakha un bo innzosetza åndarn balt.