To offer you a better browsing experience, the site uses cookies. By continuing to browse the site you authorize the use of cookies.

Arbatn in khnott

Ma mage sichar khön ke ‘z lånt vo Lusérn darkhenntze in di arbat von soin hakharkhnottn un pitt allz boda åsteat dar arbat von maurar. Di maurar vo Lusérn defatte soin hèrta khent hoachgeschètzrt in da gåntz Europa, ubarhaup zo macha au haüsar, beng un prukkn. Dar stempl von kamou sèlbart darkhennt disa bichtege arbat habante drau pròpio ponta un mazòtt, di ordenje mearar genützt von ünsarn vetar.
’Z lånt vo Lusérn zoaget hoatar allz bazta soine månnen soin gest guat zo tüana un håmaz hintargelatt zo gedenkhaz. Pa beng ummar makma seng bia di arbat von maurar iz gepezzart in di djar, bia di khnottn soin khent gearbatet hèrta mearar. Di earstn haüsar soin sichar nèt gest augemacht asó schümma azpe in di djardar boda nåsoinkhent, balda di hakhakhnottn vo Lusérn håm ågeheft zo hakha inn stiang, gesetz, pillela un asó vort. Tra in pestn arbatn vo disan månnen bölbar gdenkhan daz groaz kraütz von vraithof gemacht von Cristiano Nicolussi Zatta un di maur hèrta ume in vraithof, di stiage von Zair pa ekk au gemacht von Lino Nicolussi Morodi lestn djar von 1800.
Lai gianate ummar pa lånt makma seng vil åndre arbatn, pillela, menndla, un åndarz afte auzantn maurn von haüsar.