To offer you a better browsing experience, the site uses cookies. By continuing to browse the site you authorize the use of cookies.

Auzügln ’z vich

Zügln au vich atz Lusérn iz nia gest eppaz dèstarz; ma mocht übarleng bia ’z izta dar pèrge vo Lusérn, bi bintsche earde ’z izta un darzuar bia ’z izta ’z bèttar in a lånt au aftnan hoachan pèrge. Daz mearste soinda hèrta khent gehaltet goaz un khüa, boda håm gètt milch zo maga khesarn affon kasèll boda iz gest in lånt sin in di djar sintzekh. Ma hatt gekhesart un gemacht smaltz un dena bazta auzizkhent iz khent auzgetoalt vor biavl milch ’z izta khent getrakk vo aniaglaz.
An åndarz bichtegez sachan atz Lusérn iz gest haltn di sboi. Dise djar di lusérnar soin gånt, atz zboa von bintmånat afte fiara von toatn ka Slege, zo khoava a sboile vo nicht mearar baz 10/12 kg un håmz gezüglt vor schiar a djar sin in bintar darnå vorzaz håm gemetzeget. Haltante kunt ke von sboi djukhtma vort nicht dar gebinn iz nèt gest letz.
Vil soinda hèrta khent gehaltet da kunt di vichar zo vor di arbat, mülln un ross, magare nèt sovl genützt in di èkhar un in di bisn ma zo ziaga gehültz, un zo vüara zuar di sachandar boma hatt genützt  in lånt un zo tüana offe in bege pan bintar balz hatt gesnibet. Mülln un ross però håmse gehatt lai berda hått gearbatet zo khoava un zo vorkhova geplèttra asó bintche raiche famildje håm gehatt in di hent di gröazarstn arbatn.
Alle håm hèrta gehatt hennen un åndre khlummane vichar in gart, vorz vlaisch daz uantzege bodsa håm gehatt un vor di odjarn bosa azza soin gest genumma håmsa vorkhoaft.