To offer you a better browsing experience, the site uses cookies. By continuing to browse the site you authorize the use of cookies.

’Z gekhnöppla

Sa vor mearar baz hundart djar atz Lusérn izta gest a gehkennata khnöpplschual. Di altn kontàrn ke ettlane von schümmanarstn konsött von vraun vodar sèlln zait håm getrakk spitz gekhnöpplt von baibar vo Lusérn. Azta di åndarn spitz khemmen gemacht pitt an uantzegen van, gehèkklt odar gehöst, di khnöpplspitz soin gemacht khnüpflante au a gåntza khutta ven, biavl ma böllt. Khnöppln atz Lusérn iz a kunst boda hatt tiave burtzan, augehaltet vonar schual boda in di lestn djar von achthundart hatt abegelirnt aft disa arbat mearare baibar boda asó håm gemak gem a hilfe soinar famildja.
Allz daz sell boda vürizkhent in di earstn vüchtzekh djar von ‘900 (‘z vaür von 1911, daz earst bèltkriage, di opztziongen, vortmuchangian zo venna arbat) laise laise hatt getrakk zo lazza vorliarn disa kunst. Von bintmånat von 1996 dar Kulturinstitut Lusérn hatt bidar augelekk a schual zo lirna khnöppln, ditza iz gest möglich ankunto dar hilfe vo zboa guate maistre vo Rovrait (TN): di Cesara Perini un di Enrica Dalaiti. Asó hattma gemak zuarlesan di altn müstar un no haüt, durchgevüart vodar Barbara Pierpaoli, di khnöpplschual vo Lusérn geat vür pitt soinar arbat. Zo khnöppla böllnda soin a khnöpplpolstar, di khnöppela, dar zbirn, di khnöpplnedela, un dar mustar. Dar khnöpplpolstar iz a zilindar ingevüllt pitt gesaga inngemacht in an vlèkh un drau khinta gekhluppet dar mustar von spitz boma böllt machan. Di hknöppela boda khint augemacht dar zbirn soin pumblat, pitt holtz un atz khöpfle haltetma au in van. Dar zbirn mage soin pitt raist odar pitt bombas. Di nedela muchan håm a khöpfle zo halta vest di khnöpf. Vor aniaglan spitz muchtma håm soin mustar. Zo khnöppla  muchtma drenen un khnüpfln, asó makma håm halbe stich un gåntze stich gemischt au bia ma bill.