To offer you a better browsing experience, the site uses cookies. By continuing to browse the site you authorize the use of cookies.

Aulesan khlummane frukte

Aulesan bazta gitt dar balt iz gest di arbat boda ka herbest hatt gehaltet untar di baibar vo Lusérn un iz hèrta gest a guata hilfe zo ziaga vür, haltante kunt ke pinn letz bèttar hattma nicht gemak tüan åndarz,  ma hatt gemocht paitn in långez. Asó von herbestmånat vort di baibar soin gånt pa balt un håm augelest allz bazta iz gest vo guatz
Ma hattza gemocht leng in bege no balz iz gest tunkhl zo riva in balt balda iz khent dar takh, ma hatt augelest, hennepern, roatpern, sbartzpern, un murn. Balsa soin gest bidrumm dahuam daz earst vo alln di baibar håm vorkhoaft bazza håm gehatt gevuntet, di hennepern håmzasen vorkhoaft dar Zuegg vo Låna dazåndar in birtn vodar hoachebene. Di beldar vo Lusérn soin hèrta gest raich pitt sbemm, un soinz no haüt. Zo venna di sèlln 20 kg brigalde boda di baibar håm gehatt mengl zo gebinnanen ‘z tabrach, iztada gest mengl zo macha abe gåntze beldar un z’stiana vort an gåtzan tage, asó soinsen någenump an mupfl pult un khes. Di sbemm håmzasen vorkhoaft in marként ume 50/60 zenteseme affon kilo ma vil mearar håmsa gebunnt azzase håm vorkhoaft in platz ka Tria.
No haüt apparan altz mentsh gebinnten eppaz gianante na sbemm ma d soin hèrta mindar di baibar boda machan disa arbat.