To offer you a better browsing experience, the site uses cookies. By continuing to browse the site you authorize the use of cookies.

Zimbarzung

Di zung geredet atz Lusérn
Von Fiorenzo Nicolussi Castellan

’Z bort zimbar, boda khint ågehenk dar zung geredet atz Lusérn khint nèt ar von nåm von volk bodase hatt gehoazt asó un boda iz khent gemèkket von romé ’z djar 101 v.G. kan Campi Raudi nåmp Vercelli, ma vonan altn taütschan dialèkt.
Di zung defatte iz an Mittelhoach Taütsch drinn pitt Althoach Taütsch vodar Bavìara. Disa zung iz khent gevüart afte hoachebene vo Lusérn ume ‘z djar tausankh vo laüt vodar Bavìara boda, untar mearare vert, håm gelatt soi huamat un soin khent afte dise saitn zo venna naüaga earde auzopracha.
Dar earst briaf boda redet vo ditza iz von djar 1055 drinn soinda di nem von zbuantzekh famildje boda in a hummarzait håm gelatt soine lentar un soin khent zuar Santa Maria in Organo ka Verona.
In di zait boda disa zung iz gest mearar auzgebetart, di earstn djar von 1700, izze gest geredet vo schiar 20.000 laüt boda håm gelebet zbisnen dar Etsch un dar Brenta. Vo alóra vort izze gånt hèrta mearar vorlìrantese.
Vo allz daz sell groaz lånt boda inan tage iz gest huamt vodar Zimbarzung un von soin laüt haüt zo tage izta gestånt an uantzegez khlumma lånt: Lusérn. Auzgehakht von groazan beng, allz bazta iz vürkhent in di djarhundart, ma übarhaup dar Stoltz von soin laüt håm. gerettet da alt zung, boda no haüt, azpe da khön di sèlln bodasanen drinkhennen iz gestånt da sell vo dise djar.
Dar prof. Tyroller khütt ke a zung iz dar spètscho von laüt bodase ren; asó iz un da Zimbarzung hatt ploaz börtar zo reda von balt un von holtz, zo reda von èkhar un von bèttar.